စိတ်အပြောင်းအလဲမြန်တဲ့မဗိုက်လေးကိုစာနာပါ

စိတ်အပြောင်းအလဲမြန်တဲ့မဗိုက်လေးကိုစာနာပါ


🤰ကိုယ့်အနားမှာ စိတ်အပြောင်းအလဲမြန်ပြီး ဆတ်ဆတ်ထိမခံဖြစ်တတ်တဲ့ မဗိုက်လေးတွေမြင်ရင် အပြစ်မမြင်ပါနဲ့၊ နားလည်ပေးလိုက်ပါနော်... 

အမျိုးသမီးတွေ တစ်လတစ်ကြိမ် period လာခါနီး PMS ဖြစ်သလိုပဲ အရမ်း sensitive ဖြစ်ပြီး mood swings တွေဖြစ်တာဟာ ကိုယ်ဝန်ဆောင်မေမေတွေမှာလည်း ဖြစ်ကြတာ သဘာဝပါပဲ... 

😍အခုပဲဗိုက်ထဲကကလေးလေးအကြောင်းတွေးပြီး ရီနေပြုံးနေလိုက်၊ ဟာသမြင်ပြီးရယ်နေရာကနေ ချက်ချင်းဗိုက်တွေထဆာလိုက်ဖြစ်တာလည်း ပုံမှန်ပါပဲ ..... 

😭ဟော ခနနေတော့ ငူငူငိုင်ငိုင်ဖြစ်လိုက်၊ ဝဝဖိုင့်ဖိုင့်ကိုယ့်ခန္တာကိုယ်ကြီးကိုယ်ကြည့်ပြီး စိတ်ဓာတ်ကျလိုက်၊ ရုတ်တရက် ကိစ္စသေးသေးလေးကို ဒေါသတွေထွက်လိုက်၊ ငိုလိုက်ယိုလိုက်နဲ့ ဖြစ်လာရင် ဆန်းဆန်းတင့်တယ် မပြောပါနဲ့နော်.... 


ကိုယ်ဝန်ဆောင်မေမေတွေရဲ့စိတ်က အလိုလိုနေရင်းကို အားငယ်ပြီးနုနယ်နေတဲ့အချိန်ပါ။ ကျမဆို ကိုယ်စားချင်တာတွေ မရမကရှာပြီးစားလိုက်မှ ပြန်ကောင်းသွားသလိုလိုရှိပေမဲ့ မကြာပါဘူး အနားမှာရှိတဲ့ အမျိုးသားကို ပြဿနာရှာအော်ငေါက်မိပြန်ရော... 

တစ်ခါတစ်လေလည်း ငိုရင်းရေခဲမုန့်ခပ်စားလိုက်နဲ့ စိတ်ခံစားချက်ကတော့ roller coaster လို လုံးဝ ချက်ချင်းတက်လိုက်ကျလိုက်ပဲ ... ကိုယ့်ဟာကိုယ် "ငါများရူးသွားပြီလား?" လို့တောင်တွေးဖူးတယ် ...

တစ်ချို့ဖေဖေတွေကတော့ထင်ကြမယ်... မေမေဗိုက်လေးတွေက ဂရုစိုက်ခံချင်လို့များ သပ်သပ်ပြဿနာရှာ၊ ရစ်နေတာလားပေါ့? 

ဒါလည်းမဟုတ်ရပါဘူး... ကိုယ်ဝန်ဆောင်ချိန် mood swings ဖြစ်တယ်ဆိုတာ ပုံမှန်ပဲဖြစ်ပြီးတော့ ဖြစ်ရတဲ့အကြောင်းရင်းတွေကလည်းအများကြီးပါပဲ။ သားဦးမေမေတွေဆိုရင် ကိုယ်ဝန်ဆောင်ချိန်မှာ တအားစိတ်လှုပ်ရှားတတ်ကြတယ်၊ စိုးရိမ်တတ်ကြတယ်၊ တစ်ခါတစ်လေအတွေးလွန်ပြီးကြောက်တတ်ကြတယ်။ 


🤰ဗိုက်ထဲက ကလေးလေးကျန်းမာရဲ့လား? ကလေးမှလှုပ်သေးရဲ့လား?
🤰ကလေးမွေးရင် နာများနာမလားမသိဘူး? 
🤰ကလေးရှိလာပြီဆိုတော့ ငွေရေးကြေးရေးဒီထက်ပိုအဆင်ပြေအောင် ဘာလုပ်ရမလဲ? 
🤰ငါအမေတစ်ယောက်ဖြစ်ဖို့ အဆင်သင့်မဖြစ်သေးမှာစိုးရိမ်လိုက်တာ.. 
🤰ကလေးအတွက်ပြင်ဆင်တာတွေက မပြည့်စုံလောက်သေးဘူးထင်တယ်... 

ဒီလိုအတွေးတွေများပြီး အပြောင်းအလဲတွေအတွက် စိုးရိမ်ပူပန်မှူတွေများပြီးတော့ mood swings ဖြစ်ကြတာ သဘာဝပါပဲနော်။ 

Mood swings ဖြစ်ရတဲ့တစ်ခြားအကြောင်းရင်းတွေကတော့ - 

1. ဟော်မုန်းအပြောင်းအလဲကြောင့်။


အကြီးမားဆုံးတရားခံကတော့ ကိုယ်ဝန်ဆောင်မေမေတွေမှာဟော်မုန်းရုတ်တရက်မြင့်တက်လာတာကြောင့်ပဲဖြစ်ပါတယ်။ ကိုယ်ဝန်အစောပိုင်းအချိန်တွေမှာ အီစထရိုဂျင်နဲ့ ဂရိုဂျက်စတီရုန်းဟော်မုန်းတွေရဲ့ လွှမ်းမိုးမှုကအတော်ကြီးပါတယ်။ ဒီဟော်မုန်းတွေက လူတစ်ယောက်ရဲ့ စိတ်အခြေအနေကို ကိုင်တွယ်တဲ့နေရာမှာ အဓိကပါပဲ။ ဒါကြောင့် စိုးရိမ်စိတ်၊ ဒေါသထွက်စိတ်၊ စိတ်ဓာတ်ကျခြင်း၊ ဝမ်းနည်းခြင်းတွေ အလိုလိုဖြစ်လာတာဖြစ်ပါတယ်။ 

2. အိပ်ရေးပျက်ပြီး ပင်ပန်းနွမ်းနယ်တာကြောင့်။ 

ကံမကောင်းစွာနဲ့ အိပ်ရေးပျက်တာက ကိုယ်ဝန်ဆောင်ချိန်တစ်လျှောက်လုံးမှာကြုံရတတ်ပါတယ်။ ကိုယ်ဝန်လရင့်လာလေလေ ကိုယ်အလေးချိန်ကတက်လာလေလေ၊ ဝမ်းဗိုက်ကကြီးလာလေလေမို့ လမ်းလျှောက်ရတာလည်း လေးလံပြီး ပုံမှန်ထက်ပိုပင်ပန်းနေတတ်ပါတယ်။ မွေးခါနီးလေ လှုပ်ရှားရခက်၊ အိပ်ယာပေါ်မှာ ဟိုဖက်နဲ့ဒီဖက်တောင် ပြောင်းဖို့ အချိန်ယူပြီးဂရုစိုက်ရပါတယ်။ ညဖက်လည်း ဆီးခနခန ထသွားရတော့ မေမေဗိုက်လေးတွေမှာ အိပ်ရေးတွေပျက်ပြီး ပင်ပန်းနွမ်းနယ်နေတတ်တဲ့အတွက် စိတ်အလိုမကျဖြစ်တတ်ပါတယ်။ 


3. မူးဝေ၊ ပျို့အန် morning sickness ကြောင့်။ 

တစ်ချို့မေမေတွေမှာ ကိုယ်ဝန်စရှိတာနဲ့ ပျို့အန်ပြီး ဘာမှမစားနိုင်တဲ့ ဝေဒနာကိုခံစားရလေ့ရှိပါတယ်။ ကိုယ်ဝန် ၃ လလောက်မှာ တစ်ချို့ကအလိုလိုသက်သာသွားပေမဲ့ ကိုယ်ဝန်ဆောင်မေမေတစ်ချို့ကတော့ လရင့်တဲ့ထိ ဒီဝေဒနာကိုခံစားရပါတယ်။ 

4. ခန္တာကိုယ်အပြောင်းအလဲတွေကြောင့်။ 

လပိုင်းလေးအတွင်းမှာတင် ကိုယ့်ရဲ့ခန္တာကိုယ်က ပေါင်ချိန်တွေအများကြီးတက်သွားပြီး မျက်နှာတွေ လက်တွေ ခြေထောက်တွေ ဖောလာတဲ့ ရုပ်ပိုင်းဆိုင်ရာ ပြောင်းလဲမှုတွေကလည်း မေမေဗိုက်လေးတွေကို mood swing ဖြစ်စေပါတယ်။ ကလေးမွေးပြီးရင် အရင်လိုပြန်ဖြစ်ပါ့မလား? ဆက်ဝနေမလား? စတဲ့အတွေးတွေနဲ့ စိတ်ဖိစီးတတ်ကြပါတယ်။ 

5. စိတ်ဖိစီးမှုနဲ့ ပူပင်သောကတွေကြောင့်။ 

သားဦးမေမေတွေဆိုရင် ပိုပြီးစိတ်ပူပန်သောကများတတ်ကြပါတယ်။ ခွဲမွေးတဲ့အတွေ့အကြုံ၊ ရိုးရိုးမွေးတဲ့အတွေ့အကြုံတွေကို ကြိုတွေးပြီး စိတ်ပူပင်နေတတ်ကြပါတယ်။ ကလေးလှုပ်သေးရဲ့လား? ကလေးအတွက်ပြင်ဆင်ထားတာတွေက ပြည့်စုံပါ့မလား? ခွဲမွေး/ ရိုးရိုးမွေးတာ သူများပြောသလို အရမ်းနာမှာလား? ကလေးနဲ့ပတ်သက်ပြီးအတွေ့အကြုံမရှိလို့ ကလေးမွေးပြီး ကောင်းကောင်းမထိန်းတတ်ရင် ဘယ်လိုလုပ်မလဲ? စသဖြင့်တွေးပူလေ့ရှိကြပါတယ်။ 

ကိုယ်ဝန်ဆောင်မေမေတွေ mood swings ဖြစ်လာတဲ့အခါ စိတ်ဖိစီးမှုကို ဘယ်လိုကိုင်တွယ်ကြမလဲ? 

❤️ ခင်ပွန်း၊ မိသားစုရဲ့နားလည်ဖေးမမှုသည် နံပတ်(၁) အရေးအကြီးဆုံးဖြစ်ပါတယ်။ ခင်ပွန်းက နွေးနွေးထွေးထွေးဆက်ဆံသင့်ပြီး၊ ကိုယ်ဝန်ဆောင်မေမေကို ခါတိုင်းထက် နားလည်မှု ၂ဆပိုပေးလိုက်ပါနော်။ မိသားစုကလည်း အိမ်အလုပ်တွေ ကူညီပေး၊ ဂရုစိုက်ပေးသင့်ပါတယ်။ 

❤️ကိုယ်ကြုံတွေ့နေရတာတွေက တစ်ယောက်တည်းမဟုတ်ဘူး၊ ပြီးတော့ဒါဟာ ကိုယ်ဝန်ဆောင်ချိန်ကြုံတွေ့ရတဲ့ သဘာဝဖြစ်စဉ်ဆိုတာ အမြဲအမှတ်ရပါ။

❤️အိပ်ရေးဝဝအိပ်ပေးပါ။ ဗိုက်ကြီးပူလာလေလေ လှုပ်ရှားဖို့မလွယ် အပေါ့ခနခနသွားရ၊ အိပ်ပျော်ဖို့ခက်လာပေမဲ့ အနားယူဖို့အရမ်းအရေးကြီးပါတယ်။ 

❤️ကောင်းကောင်းစားပါ။ ကျမဆိုမွေးခါနီးထိကို စားချင်တာတွေစားမဆုံး စားပါတယ်။ အစားကောင်းကောင်းစားရရင် စိတ်ကအလိုလိုပျော်လာပါတယ်။ 

❤️အမျိုးသားနဲ့အတူတူ အချိန်ကုန်ဆုံးကြည်နူးပါ။ ကလေးလေးမထွက်လာခင် သူနဲ့ကိုယ်ရဲ့အချိန်လေးတွေ တန်ဖိုးရှိလို့ ရုပ်ရှင်တူတူကြည့်တာ၊ ဟင်းတူတူချက်စားတာမျိုးလေးတွေ လုပ်ပါနော်။ 

❤️လမ်းဖြေးဖြေးမှန်မှန်လေးလျှောက်ပြီး ကိုယ်လက်လှုပ်ရှားလုပ်ပါ။ ညဖက်ပိုအိပ်ပျော်စေပြီး စိတ်ဖိစီးမှုလျော့စေပါတယ်။ ကိုယ်ဝန်ဆောင် Yoga လေ့ကျင့်ခန်းလေးတွေလည်း လုပ်နိုင်ပါတယ်။ 

❤️တအားအပင်ပန်းခံ၊ စိတ်ဖိစီးမခံပါနဲ့။ မေမေကအမေကောင်းတစ်ယောက်ဖြစ်ဖို့ကြိုးစားနေတာဖြစ်လို့ အစစအရာရာအဆင်ပြေဖို့ပဲတွေးထားပါနော်။ 

တစ်ကယ်လို့ mood swing အဆင့်တင်မဟုတ်ပဲ တအားအခြေအနေဆိုးလာတယ်ဆိုရင် 


ဥပမာ - 

✅အမြဲစိုးရိမ်ပူပန်မှုတွေများပြီး တအားစိတ်ဆိုးဒေါသထွက်မယ်။

✅အိပ်ပျော်ဖို့အထိပါ စိတ်အနှောက်အယှက်ဖြစ်လာမယ်။ 

✅ဘယ်အရာကိုမှအာရုံမစိုက်နိုင်တော့ဘူး။ 

✅ရေတိုမှတ်ဉာဏ်အထိမေ့လျော့လာတယ်ဆိုရင်တော့ Depression အဆင့်ထိရောက်မှာစိုးတဲ့အတွက် ကျွမ်းကျင်ဆရာဝန်တွေနဲ့တိုင်ပင်သင့်ပါတယ်နော်။ 

မေမေဗိုက်လေးတို့ အားလုံး ကျန်းမာပျော်ရွှင်ကြပါစေ